La Fundaziun svizra per la protecziun da la cuntrada beneventa expressivamain il cumpromiss. In zic displaschaivel saja sulet, che hotels betg rentabels dastgan vegnir midads sulet per 50% en abitaziuns secundaras. Quai communitgescha la fundaziun. Sch'il Cussegl dals chantuns approveschia era quest model da la lescha d'abitaziuns secundaras, lura vegnia la Fundaziun per la protecziun da la cuntrada a desister d’in referendum.
Per l'hotellaria svizra engrevgescha il Cussegl naziunal la midada da structura da l'hotellaria cun approvar il cumpromiss. Quai scrivan las uniuns hotelleriesuisse, parahotellaria Svizra, GastroSuisse e la Federaziun svizra dal turissem. La decisiun da pudair midar enturn hotels betg rentabels sulet per 50% en abitaziuns secundaras, provocheschia dumondas co realisar quai.
La branscha pretenda perquai dal Cussegl dals chantuns, da pudair midar enturn hotels betg rentabels dal tut, pia per 100%, en abitaziuns secundaras.
RR Novitads 15:00