Il cuschinier Benoît Violier (44) è mort

Benoît Violier, che manava «l'Hôtel de Ville» a Crissier (VD), ha fatg suizid en si’abitaziun. Quai ha confermà la polizia dal chantun Vad. Las circumstanzas da sia mort vegnian scleridas.

Violier cun la trofea a la ceremonia "La Liste" in december 2015 Bild in Lightbox öffnen.

Legenda da maletgs: Il meglier restorant dal mund - Violier cun la trofea da la «La Liste» a la ceremonia in december 2015 a Paris. Keystone

En las raits socialas ha la mort da Violier chaschunà numerusas reacziuns. Persunalitads enconuschentas da l'entir mund han communitgà lur cordolaziuns ed era lur nunchapientscha.

«  Grond cuschinier, grond um, talent enorm. »

Paul Bocuse
cuschinier da gourmet

Violier aveva surpiglià l'onn 2012 ensemen cun sia dunna il restaurant «Hôtel de Ville» a Crissier. Il 2013 aveva il guid da restaurants Gault Millau elegì el sco cuschinier da l'onn - ed il Michelin aveva dà 3 stailas al restaurant.

Ensemen cun ils nums Girardet e Rochat stettia il num da Violier per l’istorgia da success da «l'Hôtel de Ville» a Crissier, ha ditg il cusseglier da regenza vadais, Pascal Broulis, envers las medias.

Anc avant intginas emnas aveva il restaurant da Benôit Violier survegnì il titel da «meglier restaurant dal mund», scriva la sda. Oz, glindesdi, aveva il guid gastronomic «Guide Michelin» spetgà Violier a la premiera da l'ediziun 2016 a Paris.

RR novitads 06:00