Siglir tar il cuntegn

Svizra Il cussegl da la citad survegn damain paja

Als commembers da la suprastanza da la citad da Lucerna vegn la paja scursanida marcantmain. Il suveran da Lucerna ha approvà ina iniziativa da la PPS che limitescha la paja dals cussegliers da la citad sin 200'000 francs.

Forsch taglia ina nota da 200 francs
Legenda: Lucerna reducescha las pajas dal cussegl da la citad per mintgamai 40'000 francs. mad

Actualmain survegn in commember dal cussegl da la citad 247'000 francs ed il president da la citad 264'000 francs ad onn. Il cussegl da la citad è trumpà ed interpretescha il resultat da votaziun era sco critica generala vid il cussegl. Tenor ses avis haja il gea plirs motivs, tranter auter la situaziun finanziala difficila da la citad.

Il suveran ha approvà l'iniziativa cun 13'027 cunter 7'813 vuschs. Era la cuntraproposta dal parlament, che leva scursanir pli pauc la paja, è vegnì approvà. Cun 9'279 cunter 9'150 vuschs è il resultat dentant stà stgars.

Dumonda decisiva ha decidì

Tar la dumonda decisivia han 57,4 % cruschà en l'iniziativa, uschia che la paja vegn scursanida pli fitg. Cura che l'iniziativa entra en vigur n'è anc betg cler. La decisiun giaschia tar il parlament da la citad, uschia ha communitgà il cussegl da la citad.

RR novitads 15:00