Il Cussegl federal fa nova emprova per cumprar aviuns da cumbat

Il Cussegl federal ha lantschà las lavurs preliminaras per evaluar la cumpra da novs aviuns da cumbat. Il minister da defensiun Guy Parmelin vegn ad engaschar ina gruppa d'experts. A partir dal 2025 pudessan quels sgular en Svizra.

Aviuns dal cumbat da l'armada Svizra dal tip F/A 18. Bild in Lightbox öffnen.

Legenda da maletgs: Er ils aviuns dal tip F/A 18 ston vegnir remplazzads ils proxims onns. Keystone

Sco emprim vegnan fatgas lavurs da preparaziun per in proceder d’examinaziun d’aviuns. Uschia duai ina gruppa d’experts vegnir lantschada cun commembers da l’armada, da armasuisse e dal secretariat general dal VBS. Quests experts duain sclerir fin primavaira 2017 dumondas fundamentalas sco basegn, proceder ed aspects industrials.

Co remplazzar ils aviuns F-5 Tiger

Il medem mument duai uss la gruppa d’experts far ponderaziuns co agir cun ils 54 aviuns dal tip F-5 Tiger. Quels aviuns èn gia vegls ed il Cussegl federal aveva previs da remplazzar els cun ils aviuns dal tip Gripen. Lezza cumpra ha dentant fatg naufragi a l’urna. Ultra da quai sa tschenta la dumonda co agir vinavant cun ils 31 aviuns dal tip F/A 18. Ina prolungaziun dal diever sur l’onn 2025 ora fiss pussaivla ma cun auts custs.

RR novitads 15:00