Siglir tar il cuntegn

Svizra Il Cussegl federal refusa duas iniziativas

L’iniziativa «Dretg svizzer enstagl da derschaders esters» maina a malsegirezza giuridica e faschess donn a l'economia, quai l’argument dal Cussegl federal. El propona da refusar a l’iniziativa per l’auto-determinaziun da la PPS. Ed era «l'iniziativa per in daner real» vegn refusada.

L'iniziativa è vegnida inoltrada ils 12 d'avust 2016.
Legenda: L'iniziativa è vegnida inoltrada ils 12 d'avust 2016. Keystone

Il Cussegl federal di NA a l’iniziativa per l’ autodeterminaziun da la partida populara svizra. El propona al parlament da refusar l’iniziativa senza far ina cuntraproposta.

Il Cussegl federal quinta che las consequenzas negativas per la politica exteriura da la Svizra fissan considerablas. Uschia perdess la Svizra il status sco partenari credibel, scriva il Departament federal da giustia e polizia.

La PPS vul dretg svizzer avant dretg internaziunal

Cun l’iniziativa vul la partida populara francar en la lescha che la Constituziun federala ha prioritad giuridica envers il dretg internaziunal. L’iniziativa sto uss vegnir tractada en il parlament.

Era l’iniziativa per in daner cumplain refusa il Cussegl federal

Il Cussegl federal refusa «l'iniziativa per in daner cumplain» senza cuntraproposta. L'iniziativa na tegnia betg quai ch'ella empermettia ha declerà cusseglier federal Ueli Maurer. Enstagl da dapli segirezza smanatschan cun il daner cumplain tenor il Cussegl federal stremblidas en il sistem da finanzas e gronds donns per l'economia publica.

La Banca naziunala duai avair il monopol

L'iniziativa per in daner cumplain vul dar a la Banca naziunala il monopol ed uschia la controlla da l'entira quantitad da daners che stat a disposiziun.

RR novitads 14:00+