Ils respargns en il preventiv 2016 ed il program da stabilitad na tanschian betg per cuntanscher in equiliber structural, scriva il Cussegl federal. Ils proxims onns creschia il deficit perquai constantamain.
L'onn 2017 quinta il Cussegl federal cun in deficit da 500 milliuns francs - l'onn 2019 mancan probabel gia ina milliarda en cassa federala.
Cunquai che l'economia en Svizra na saja betg creschida uschè fitg suenter ch'il curs minimal era vegnì schlià, sajan er las perspectivas mendras. Il Cussegl federal haja stuì curreger il plan d'entradas.
Expensas supplementaras
Ils proxims onns vegn i er a dar expensas supplementaras. Tranter auter pervi da la lescha davart la refurma da l'imposiziun da taglia sin interpresas e pervi dals daners che van en ils fonds da vias naziunalas e dal traffic d'aglomeraziun. Vitiers vegnia anc la refurma da la prevenziun per la vegliadetgna 2020 ed il dumber da dumondas d'asil che saja creschì marcantamain.
Libertad d'agir davent dal 2019
Il Cussegl federal quinta che la situaziun sa normaliseschia puspè davent dal 2019. Lura èsi previs d'augmentar il plafond d'expensas da l'armada sin 5 milliardas francs.
Enfin la primavaira vul il departament da finanzas dal Cusseglier federal Ueli Maurer preschentar ina proposta per l'agir dal proxim temp.
RR novitads 15:00