Il Dalai Lama è vegni envidà da la chasa da las religiuns sco er da la regenza da la citad. Igl sa tracta d’ina visita betg uffiziala, accentueschan las autoritads.
Quai fan ellas pervi che la China ha crititgà la visita. La Svizra uffiziala para da na betg vulair vilentar il partenari da commerzi. Fertant che la citad da Berna na veglia betg ch’auters stadis sa maschaidan en lur politica, na veglia ella dentant n’er betg provocar difficultads diplomaticas – scriva la sda.
L’occurrenza en la chasa da las religiuns n’è betg publica. Dentant ha il Dalai Lama in’occurrenza publica en il Kursaal. Quella è vendida ora. Il Dalai Lama vegn a dir pertge ch’i vul dialog e solidaritad en la crisa globala.
A partir dal venderdi è il Dalai Lama giast a Turitg. Suenter cuntinua el ses viadi tras l’Europa cun visitar la Slovachia, la Tschechia e l’Italia.
En la chasa da las religiuns èn dapi il 2014 las otg pli grondas religiuns sut in tet.
RR novitads 17:00