Siglir tar il cuntegn

Svizra Il dumber da las chasadas crescha marcant

Dapi il 1850 è la populaziun svizra sa multiplitgada cun trais, il dumber da tegnairchasas dentant è sa multiplitgà cun set. Quai saja in augment rasant dals tegnairchasas privats, scriva l’Uffizi federal da statistica.

Dus balcuns in su in sut.
Legenda: Ils tegnairchasa pitschens creschan marcant fin il 2045. Keystone

Sco l'Uffizi federal da statistica quinta, vegnan ils tegnairchasa era a crescher ils proxims decennis rasant, surtut tegnairchasa pitschens. Uschia quinta l’uffizi cun scenaris tranter il 2017 ed il 2045 d'in augment dals tegnairchasa privats da 3,7 sin 4,6 milliuns persunas.

Ils tegnairchasa gronds na creschan betg marcant

Ils tegnairchasa cun trais e dapli persunas vegnan sulet a s’augmentar per in dieschavel, scriva l’uffizi. Uschia duajan quels crescher dad oz 1,2 milliuns fin il 2045 sin 1,3 milliuns tegnairchasas pli gronds, scriva l’uffizi.

Different svilup en las regiuns

Il dumber da tegnairchasa crescha surtut là nua che la populaziun crescha. Uschia quinta l’uffizi surtut per ils chantuns Friburg, Turgovia, Vad e Vallais fin il 2045 cun in plus da 30 fin 40%. Per chantuns sco la Sutsilvania, Basilea Citad, Appenzell Dadens ni er per il chantun Uri cun in carschen relativ dals tegnairchasa fin il 2045 per 5 fin 10%.

Migraziun è motiv principal

La migraziun è il motiv principal per quest boom dals tegnairchasas, ed en general per l’augment da la populaziun en Svizra, scriva l’Uffizi federal da statistica. Ch’adina dapli persunas vivan en in tegnairchasa pitschen, saja surtut d’attribuir a pli paucas naschientschas ed al carschen da l'aspectativa da vita. Uschia datti adina damain uffants per tegnairchasa, ed adina dapli persunas betg maridadas.

RR novitads 16:00