L'onn passà han passa 233'000 persunas traversà las Alps Svizras en il Glacier Express. Quai èn tantas sco strusch insacura, communitgescha la Glacier Express SA. L'augment saja d'attribuir a la bell'aura da la stad passada. Quella haja augmentà las reservaziuns spontanas, dentant hajan er las pussaivladads da reservar pli simplas contribuì a l'augment, scriva l'interpresa.
Dapi il 2017 ha il Glacier Express pudì augmentar il dumber da giasts per bunamain 25%. Quai suenter che l'interpresa aveva gì da cumbatter durant ils onns passads cun cifras diminuidas. Suenter l'onn da record il 2008, cun 260'000 passagiers, era il dumber da giasts adina puspè sa reducì. Il 2016 aveva il Glacier Express anc transportà 186'000 persunas atras las Alps.
RR novitads 11:00
