Il pli grond implant fotovoltaic en las Alps Svizras furnescha per l’emprima giada current electric en la rait. L’implant al lai da fermada Muttsee en il chantun Glaruna furnescha l’entir onn current per radund 700 chasadas. El ha ina surfatscha da 10'000 meters quadrat ed è quasi in kilometer lung.
Tals implants ord la muntogna fissan centrals per garantir la forza electrica er durant l’enviern. Dentant sajan els pretensius e chars. Perquai fissan indemnisaziuns pli grondas per ils gestiunaris d’avantatg, manegia Jörg Ruhrer che docescha a la Scola auta turitgaisa per scienzas applitgadas. En la muntogna dettia bleras surfatschas libras nua ch'implants fotovoltaics pudessan producir current electric. Dentant sajan protecturs da la cuntrada per regla pauc intgantads da quest’idea.
