Schneider-Ammann surpiglia l’uffizi da Simonetta Sommaruga. Per il 2016 ha el en general 3 finamiras, sco el ha ditg en la Samstagsrundschau da Radio SRF.
1. La relaziun cun l’UE
Primo veglia el sclerir la relaziun cun l’Uniun europeica. L’UE saja il segund impurtant partenari da commerzi da la Svizra, uschia il futur president da la Confederaziun. Schneider-Ammann veglia in’occupaziun cumplaina.
2. Il ferm franc
Secundo definescha Schneider-Ammann il ferm franc sco sfida essenziala, la quala quai munta da cumbatter. La Svizra na dastgia betg sa deindustrialisar plaunamain. Quai saja ses pli grond quità. Las consequenzas da quai haja el vis en auters pajais. I sa tractia d’in process irreversibel cun la consequenza da dischoccupaziun.
3. La politica da fugitivs
Il terz grond tema dal 2016 è per Schneider-Ammann la migraziun e la politica d’asil e da fugitivs. Fin uss n’haja l’unda da fugitivs betg cuntanschì la Svizra. Quai saja dentant in dumonda dal temp. Perquai saja quai impurtant d’avair recepts per dumagnar la problematica da fugitivs. Schneider-Ammann è sa mussà plain fidanza, ch’il Cussegl federal ed ils chantuns pon chattar ensemen ina soluziun a moda constructiva.
«Jau na pos betg far naiver»
Plinavant è il president da la Confederaziun tranter auter s’exprimì davart il turissem. La Confederaziun na possia betg schliar ils problems actuals da la branscha da turissem, ha el ditg.
«Jau na pos betg far naiver», uschia Schneider-Ammann. El ha appellà a la branscha da reclama ed a las associaziuns turisticas. La Svizra possia porscher bleras rutas da viagiar ed autras attracziuns en citads e champagna. Reclama sistematica en ils pajais da mira è il chavazzin per Schneider-Ammann.
RR novitads 14:00