Il prer catolic da Bürglen en il chantun Uri n'inoltrescha betg sia demissiun sco pretendi da l'uvestg Vitus Huonder. Tenor ina communicaziun dal cussegl da baselgia na vesa el nagin motiv per bandunar sia plaiv.
Vitus Huonder aveva pretendi la demissiun dal prer Wendelin Bucheli suenter che quel aveva benedi in pèr omosexual. Questa benedicziun n'è tenor l'uvestg da Cuira betg cumpatibla cun la teoria catolica.
Cunquai che Bucheli era vegnì ordinà da l'uvestgieu da Losanna-Genevra-Friburg stoppia uss lez tschertgar il discurs cun il prer. L'uvestgieu da Cuira respectia quest process, hai num en ina communicaziun.
