Tar la conferenza da medias da la Confederaziun la mesemna da mezdi, ha l'emprim Patrick Mathys da l'Uffizi federal da sanadad BAG dà ina nova survista dals cas en Svizra. Interessà han dentant era las novas davart la situaziun al cunfin cun l'Italia.
Cunfin Svizra – Italia
Dapi il cumenzament da l'emna fa la Svizra controllas als cunfins svizzers cun l'Italia, pia en il Grischun, en il Tessin ed en il Vallais. Las autoritads da la duana svizra han installà 83 posts da controlla al cunfin cun l'Italia. E per immediat serrian els 9 passagis dal cunfin vers l'Italia, ha aschuntà il directur da l'Administraziun federala da duana Christian Bock.
Serrads èn davent dad immediat ils suandants passagis: Pedrinate, Ponte Faloppia, Novazzano Marcetto, San Pietro di Stabio, Ligornetto Cantinetta, Arzo, Ponte Cremenaga, Cassinone ed Indemini. Passagis grischuns n'èn betg pertutgads.
Persunas che vulan vegnir da l'Italia en Svizra na pon las guardias da cunfin betg trametter enavos, era sch'ellas n'han nagina lubientscha da lavurar. Il mument n'haja la Svizra nagin instrument legal per tegnair enavos ina persuna che vul vegnir ord l'Italia en Svizra, ha Christian Bock punctuà.
Nova strategia dal cumbat
Dapi la fin d'emna haja il BAG midà sia strategia, punctuescha Patrick Mathys. Els n'emprovian betg pli d'identifitgar l'entira via da surdar il virus davent da mintga persuna testada positiv.
La finamira actuala da la Svizra saja – da procurar ch'il coronavirus sa derasia uschè plaun sco pussaivel en Svizra. Quai duai gidar ch'il sistem da sanadad na vegnia betg a ses cunfins.
Plirs puncts ch'èn d'observar
Persunas che na tutgan betg tar ina gruppa da ristg, na duain betg currer tar il medi – e gea betg tar ina staziun d'urgenza. Quest giavisch a la populaziun ha Patrick Mathys. Sche persunas han dubis davart lur sanadad, lura duain ellas telefonar a lur medi da chasa u ad in da las numers publitgads dals chantuns.
Tgi che haja sintoms da malsogna, possia senz'auter restar a chasa, ha aschuntà Patrick Mathys. Lura saja impurtant d'evitar ulteriurs contacts. E cura ch'ils simtoms han lura laschà suenter, saja anc da spetgar ina giada 24 uras.
Indemnisaziun per lavur curta
La Confederaziun vegnia a flexibilisar l'indemnisaziun per lavur curta, ha infurmà Marie-Gabrielle Ineichen-Fleisch dal Seco. Ils posts en ils chantuns possian reducir il termin da preannunzia da 10 sin 3 dis, ha ella precisà.
Annullar viadis en l'exteriur
Viagiaturs che pondereschan tge far, sch'els han gia cudeschà viadis en l'exteriur, ston contactar ils organisaturs da viadis e las assicuranzas. Quels decidan en atgna cumpetenza tge ch'els proponan, e sch'els surpiglian eventualmain ils custs tar annullaziuns.
Infurmà han a la conferenza da medias:
- Patrick Mathys, manader da la secziun «mesiras da crisas» e collavuraziun internaziunala, BAG/EDI
- Marie-Gabrielle Ineichen-Fleisch, secretaria statala, Seco/WBF
- Christian Bock, directur da l’Administraziun federala da duana EFD
- Hans-Peter Lenz, manader dal center per il manaschament da crisas, EDA