Siglir tar il cuntegn

Header

cuntegn

Il pli nov tar il coronavirus Swissmedic lubescha «Ronapreve»

L'institut per products terapeutics Swissmedic ha lubì uffizialmain il medicament da corona Ronapreve en Svizra. Ronapreve po ussa vegnir duvrà sco tractament u prevenziun cunter la malsogna. Quai ha communitgà Swissmedic. Enfin ussa dastgava il medicament da Roche vegnir prescrit be tenor l'ordinaziun da Covid-19.

audio
Swissmedic lubescha il medicament da corona «Ronapreve»
ord RTR Audio dals 27.12.2021.
laschar ir. Durada: 37 Secundas.

Ronapreve è l'emprim medicament per la prevenziun da Covid-19 ch'è lubì en Svizra.

Ronapreve cunter in grev decurs dal virus

Tenor Swissmedic po Ronapreve vegnir duvrà tar creschids e giuvenils a partir da 12 onns cun in pais dal corp d'almain 40 kilograms. Il medicament po gidar cura ch'ina terapia d'oxigen u in'ospitalisaziun n'èn betg necessarias, ma i dat ina gronda ristga per in grev decurs da la malsogna. Plinavant po el er vegnir prescrit sch'ina pazienta u in pazient na mussa nagina reacziun d'immunitad sin la vaccinaziun pervia d'ulteriuras malsognas u terapias.

Ronapreve sbassa la ristga che persunas cun ina leva fin mezgreva malsogna ston ir a l'ospital u moran. Ultra da quai sa reducescha era la ristga da s'infectar suenter avair gì contact cun il virus. Roche lavura vinavant ensemen cun Swissmedic per augmentar l'access al martgà per er pudair duvrar il medicament tar persunas ospitalisadas pervia da Covid-19.

L'effect cunter omicron n'è anc betg enconuschent

Dapi il mars 2021 ha Swissmedic examinà Ronapreve en in'uschenumnada expertisa successiva. Uschia è il medicament gia en diever dapi mez matg. Tenor Roche èn gia passa 2'500 persunas vegnidas tractadas cun quel en Svizra. Quant grond che l'effect da Ronapreve è cunter la varianta omicron na po Swissmedic anc betg dir.

RTR novitads 11:00

Artitgels legids il pli savens

Scrollar a sanestra Scrollar a dretga