Siglir tar il cuntegn

Header

Mintg’ina da las 209 federaziuns sto dar giu singul la vusch.
Legenda: Mintg’ina da las 209 federaziuns sto dar giu singul la vusch. Keystone
cuntegn

Svizra Il president da la Fifa vegn elegì

Al congress da la Fifa a Turitg è il mument las elecziuns per il president. Ils dus candidats il prinzi da la Jordania Ali bin al-Hussein ed il president actual Sepp Blatter han tegnì in pled avant las federaziuns da ballape.

Las elecziuns èn ina lunga procedura, mintg’ina da las 209 federaziuns sto dar giu singul la vusch. En l’emprim scrutini dovra il candidat ina maioritad da duas terzas, quai vul dir 139 vuschs, en il segund scrutini tanscha lura la maioritad absoluta da 105 vuschs.

Smanatscha da bumba

Cunter il congress da la Fifa a Turitg hai dà ina smanatscha da bumba. La polizia turitgaisa ha confermà la smanatscha. Entant che la polizia inspectescha la halla, cuntinuescha il congress sco prevesì.

Appel da cumbatter la corrupziun

L'avantmezdi aveva il president da la Fifa Joseph Blatter appellà da sa participar activamain al cumbat cunter la corrupziun. Cun spiert da team saja quai pussaivel da cuntinuar ensemen, ha el ditg als represchentants da las 209 federaziuns commembras.

Els sajan sa radunads per prender a maun ils problems, ha Joseph Blatter ditg al congress a Turitg sa referind sin las turbulenzas tar la Fifa ils ultims dis. Quai suenter che 7 funcziunaris da la Fifa èn vegnida arrestads pervia da suspect da corrupziun.

Punct culminant dal congress è l'elecziun d'in nov president. Candidats èn Blatter ed il prinzi Ali bin al-Hussein da la Jordania.

Fifa quinta cun lung congress

Sco quai ch’i para quinta la Fifa cun in congress lung. La conferenza da pressa tradiziunala suenter il congress è spustada sin damaun da mezdi. Planisada era ella questa saira las set.

Gievgia saira ha Josef Blatter avert uffizialmain il congress da la Fifa a Turitg ed ha numnà ils schabetgs dals ultims dis ina vargugna per il ballape.

Maurer crititgescha la Fifa

Il minister da sport svizzer, Ueli Maurer, ha ditg en ses pled ch'i na dastgia betg esser che Blatter saja ussa il culpabel principal. Maurer ha dentant era remartgà che la Fifa na saja betg credibla, la federaziun saja crudà ord la ballantscha.

En vista al congress da la Fifa hai era dà pliras acziuns da protest. Per l'ina per excluder l'Israel da la federaziun e per l'autra pervi da la situaziun precara sin plazzals dal campiunadi mundial a Katar.

RR novitads 9:00/11:00/12:00

Artitgels legids il pli savens

Scrollar a sanestra Scrollar a dretga