Siglir tar il cuntegn

Header

cuntegn

Svizra «Il resvegl da la forza» – Il nov film da Star Wars

Da mesanotg vegn il nov Star Wars «Il resvegl da la forza» en ils kinos. La istorgia dal nov film è situada 30 onns suenter la fin dal terz film «Il return dals Jedi» da l’onn 1983.

audio
Bunura: Bun a savair per chapir la nova episoda da Star Wars
ord Actualitad dals 16.12.2015.
laschar ir. Durada: 2 minutas 32 Secundas.

Il cumbat tranter bun e nausch cuntinuà - quai per il plaschair da blers fans. Per insaquants è Star Wars dapli ch’in hobi. Igl è bunamain ina religiun. E per vair: en l’Australia datti schizunt ina religiun da Jedi, il Jediissem.

Per auters è Star Wars dentant in mund absurd, betg chapaivel, che chaschuna confusiuns cun ses planets e figuras misticas. Ina curta survista da l’impurtant da l’univers da Star Wars:

Ils Sith

Ils Sith èn ils nauschs, ils adherents da la vart stgira da la pussanza. Lur finamira è da surpigliar la pussanza da l’entira galaxia. Per cuntanscher lur finamira fan els chatscha sin ils Jedi. L’imperi dals Sith vegn regì dad in imperatur. Il pli nausch è il Darth Sidious, era enconuschent sco l’imperatur Palpatine.

Ils Jedi

Ils Jedi èn ils buns. Lur principis èn la pasch, l’armonia e la savida. Lur incumbensa è da schliar tut ils conflicts en la galaxia – sche pussibel senza armas. Dentant sche necessari fan era els diever da lur spadas da glisch, l'arma tradiziunala dals Jedi ed dals Sith. Quellas spadas consistan dad ina curta manetscha ed ina nezza da glisch, da «laser».

Luke Skywalker

Luke Skywalker è la persuna principala dals trais emprims films. Cun 19 onns entschaiva Luke la scolaziun da Jedi e fa lasuenter part ad ina allianza da rebels che cumbatta l’imperi dals Sith. Era la princessa Leia fa part a quella allianza. Luke e Leia èn schumellins, èn dentant vegnids separads suenter la naschientscha e na san perquai ditg nagut in da l'auter. Lur bab è Anakin Skywalker, enconuschent sco Darth Vader.

Darth Vader

Darth Vader è in general dals Sith ch’era da giuven atgnamain in Jedi. El vegn dentant surmanà a la vart stgira da la pussanza tar ils nauschs. Senza scrupels fa el chatscha cun sia spada da glisch cun nezza cotschna sin Jedi. Pli tard daventa el anc tuttina in dals buns e mora vi da sias blessuras suenter ch'el spendra ses fegl Luke Skywalker.

Han Solo

Han Solo è cuntrabandist, fa part a la colliaziun dals rebels e cumbatta ensemen cun Luke e Leia l’imperi. Han Solo s'inamurescha en Leia ed els maridan lasuenter. Ses meglier ami e cumpogn è il Wookiee Chewbacca.

Artitgels legids il pli savens