Siglir tar il cuntegn

Svizra Il sboz per la lescha da medias electronicas provochescha critica

En il sboz dal Cussegl federal davart ina nova lescha per medias electronicas na vegn il rumantsch betg resguardà. Quai n'è betg acceptabel per la Lia Rumantscha, la societad purtadra dad RTR la SRG.R sco era per il cusseglier naziunal Martin Candinas.

Legende: Video Sboz da nova lescha da medias procura per critica abspielen. Laufzeit 02:52 Minuten.
Or da Telesguard dals 21.06.2018.

Ina nova lescha davart las medias electronicas duai remplazzar la lescha da radio e televisiun vertenta. En quella na duai in radio da lingua rumantscha betg pli esser scrit en la lescha. Cussegliera federala Doris Leuthard ha preschentà il sboz a las medias. Il sboz è uss en consultaziun.

Ina proposta ch'ha fatg surstà

I saja ina proposta che tschantschia cunter la quadrilinguitad en Svizra, quai di il cusseglier naziunal Martin Candinas. Per el n'è il sboz dil Cussegl federal che garantescha emetturs en tut las linguas naziunalas danor en rumantsch betg acceptabel. Tenor el stoppian tut las quatter linguas naziunalas vegnir tractadas tuttina en questa chaussa. Er il secretari general da la Lia Rumantscha Martin Gabriel è tut auter che cuntent cun il sboz. El haja l'entschatta pensà che quai saja ina sgnocca. La Lia Rumantscha vegnia en tutta cas a prender posiziun e far encunter.

Era la directura dad RTR Ladina Heimgartner conceda ch'ella saja stada surstada cura ch'ella haja legì il sboz. RTR e l'SRG SSR studegian uss en detagl la nova lescha e vegnian lura a prender posiziun – er per il rumantsch.

Per la SRG.R n'èsi betg gist

I fiss in scandal sch'i na stess betg pli scrit en la lescha ch'i duess dar almain in radio en lingua rumantscha, uschia il president da la SRG.R Oscar Knapp. En la lescha vertenta è quai perscrit, en il sboz per la nova betg pli. Tenor il sboz per la nova lescha stoppia la SRG be resguardar il rumantsch a moda e maniera adequata. Il Cussegl federal ha avert la consultaziun davart questa nova lescha.

En cumparegliaziun cun la veglia lescha fiss quai in pass enavos.
Autur: Oscar KnappPresident da la SRG.R

Sustegn per medias online

Il sboz per la nova lescha prevesa er che medias electronicas vegnian sustegnidas finanzialmain per lur purschidas da service public. Il Cussegl federal vul render quint a la midada dal diever da las medias en Svizra. Concret duain er las purschidas online vegnir resguardadas en la lescha e betg mo quellas da radio e da televisiun. Uschia pudessan er las medias online vegnir sustegnidas finanzialmain.

Digitalisaziun ed medias online

Tras la digitalisaziun giogan las medias online ina rolla adina pli centrala en il mund da medias. Cussegliera federala Doris Leuthard ha preschentà il sboz da lescha a las medias. Per proteger la pressa vul il Cussegl federal be sustegnair medias online, che sa concentreschan sin purschidas da audio u video.

Sco la cussegliera ha accentuà envers RTR na saja l'existenza d'in radio en rumantsch betg periclità. En la lescha vegnia be francà, tge ch'il service public stoppia porscher en tut las regiuns linguisticas. Cun la libertad da program possia la SRG.SSR er ir sur ils cunfins ora.

Il rumantsch è gia oz part dal program da la SRG.SSR e perquai garantì.
Autur: Doris LeuthardCussegliera federala

Per sustegnair directamain gasettas – sche quellas sajan squitschadas u betg – manchia tuttina la basa constituziunala, uschia ha la cussegliera federala Doris Leuthard accentuà. Il Cussegl federal è persvadì che la nova lescha correspundia al temp e possia garantir in service public extendì e dad auta qualitad.

RR novitads 09:00+