Siglir tar il cuntegn
Inhalt

Svizra Il Tessin sto surlavurar ses scumond da burca

Duas persunas privatas avevan fatg recurs cunter la lescha davart il scumond da zuppentar la fatscha che vala dapi il 2016. Il Tribunal federal ha uss approvà ina part dals recurs, il Cussegl grond tessinais sto meglierar la lescha.

Pliras dunnas che zuppentan lur fatscha.
Legenda: Cunzunt turistas che visitan la Svizra zuppentan lur fatscha. (maletg d’archiv) Keystone

En sia sentenzia pretenda il Tribunal federal, ch’il Cussegl grond dal Tessin agiuntia duas ulteriuras excepziuns a la lescha davart il scumond da zuppentar la fatscha. Memia lunsch van tenor la pli auta dretgira disposiziuns che pertutgan la libertad da sa radunar e d’opiniun sco era la libertad economica.

Las novas excepziuns

Da nov duai la lescha lubir a participants e participantas d’ina demonstraziun da purtar mascras, sche l’urden public n’è betg periclità. E sco segund stoi era esser pussaivel d’organisar acziuns da reclama ed autras occurrenzas commerzialas, nua che persunas cuvran lur fatscha.

Cunzunt chastis per fans da ballape

Il scumond da zuppentar la fatscha en il Tessin è en vigur dapi il 1. da fanadur 2016. Fin uss ha quel pertutgà cunzunt fans da ballape mascrads, sco la direcziun da giustia aveva communitgà il cumenzament da l’avust. Dunnas cun burka u niqab percunter n’èn strusch anc vegnidas chastiadas.

RR actualitad 16:00