Il traffic enil tunnel da basa dal Gotthard passa senza incaps. La dumonda tar ils trens da Intercity ed Eurocity saja en cumparegliaziun cun l’onn avant s’augmentada per radund 30%. Era la punctualitad dals trens è sin la lingia dal Gottard è sa megliurada. Tuttina dettia quai anc spazi d’agir, il focus giaschia qua sin ils retards da l'Italia e la disponibladad dal material rudlant, scriva la viafier federala.
L'Italia porscha la pli gronda sfida
La punctualitad tar ils passagiers saja dapi l'entschatta Dezember s'augmentada da 79,6% sin 86,8%. La punctualitad per pudair cuntanscher in tren da colliaziun saja s'augmentada ad Arth-Goldau da 94,4% sin 97,1%.
Greva saja la situaziun anc adina cun il traffic che derivia da l'Italia. Ils trens da l'Eurocity da Milaun arrivian savens cun retard a Chiasso e partian là cun in retard d'en media 8 minutas. Grazia a las reservas da temp pon questas 8 minutas dentant vegnir pridas suenter enfin Arth-Goldau.
Dapi la midada da l'urari ils 11 da dezember haja dà en tut 43 trens ch'èn crudads or. Ils blers pervi da disturbis vid ils vehiculs. Grazia als trens da reserva plazzads en il Tessin sajan las consequenzas en il traffic naziunal dentant stadas pitschnas.
RR novitads 12:00