Siglir tar il cuntegn

Header

cuntegn

Svizra Il VCS vul retrair lubientscha a VW

In onn suenter ch’il scandal da svapur tar VW è vegni enconuschent, èn vegnids reparads pir 10% dals autos pertutgads dal sbagl en Svizra. L'associaziun da traffic ed ambient VCS pretenda perquai da retrair la lubientscha als constructurs pertutgads.

Tests demussian che las emissiuns d'oxid da nitrogen surpassian fin a 25 giadas la limita tar vehichels da diesel. L’importader general da VW, l’AMAG na sa tegnia betg vida las empermischuns, ha er confermà ina pledadra da la protecziun dals consuments. Tenor in pledader da l’AMAG sajan questas reparaturas cumplexas, per blers models da VW en Svizra saja la software necessaria pir disponibla a partir da l’emna proxima.

Plants svizzers a Braunschweig

La procura publica da Braunschweig investighescha cunter 30 persunas accusadas. Sche l'autoritad porta plant u betg n'è anc betg decidì. Ils process pudessan cumenzar il pli baud il 2017. L'avrigl ha la procura federala svizra transferì radund 2'000 denunzias penalas da la Svizra a Braunschweig. L'argumentaziun: Là vegn resguardà l'entira situaziun dals fatgs ed uschia tut ils 11 milliuns vehichels pertutgads.

La Fundaziun per la protecziun da consuments SKS n'è betg d'accord cun quai. las autoritads sajan obligadas da far las investigaziuns perquai ch'ils delicts sajan capitads en la Svizra.

Il constructur d'autos Volkswagen cumbatta a tuttas fronts per sa dustar cunter las consequenzas da la pli greva crisa dal concern. En l'affera davart 11 milliuns autos manipulads sin l'entir mund èn silpli las emprimas etappas prendidas. Ina cumparegliaziun en ils Stadis Unids custa il concern 14,7 milliardas dollars. I smanatschan ulteriurs plants civils.

RR novitads 16:00

Artitgels legids il pli savens