Siglir tar il cuntegn
cuntegn

Svizra Ils 3 finalists per in nov imni naziunal svizzer èn tschernids

Svizras e Svizzers han tschernì cun in voting online las 3 chanzuns finalistas. Tenor il musicist e scolast da musica a la scola chantunala Iso Albin èn tuttas 3 fitg «romanticas».

maun d'in um sin il cor sut il t-shirt cotschen cun crusch alva
Legenda: La concurrenza per in nov imni naziunal finescha cun il final il 12 da settember. Keystone

Quai ch'è communabel a tut ils 3 finalists è tenor Iso Albin la harmonia romantica tradiziunala. Tgenina che pudess esser ina cumposiziun rumantscha na sappian ins betg. La concurrenza è anonima. Tenor Iso Albin fiss il pli tgunsch anc la varianta B eventualmain ina rumantsch, la varianta E tunia per el plitost da Svizra franzosa.

Il caracter dals 3 finalists

La varianta A che ha la medema melodia sco l'imni actual, entschaivia cun in maletg fitg ferm, in che restia, di Iso Albin. «Sin fund cotschen ina crusch» è l'emprim vers da la nova chanzun. Il text saja vegnì adattà uschia ch'el plidenteschia in collectiv. Era la melodia saja senza dubi ferma. Quai er ord il simpel motiv «ch'ei havess schiglioc schon daditg dau ina nova».

Varianta B semeglia fitg la varianta A, saja però scritta en quatter quarts. Er questa plai al scolast da musica. Ins possia sa disar vid la melodia. In punct negativ chatta Albin dentant en la varianta tudestga da la chanzun. Il plaid «Reiz» na saja betg uschè chantabel. En tut hajan las translaziuns dentant plaschì bain ad Iso Albin. Ins sentia ch'i saja vegnì dà fadia da far las translaziuns.

La varianta E tunia il pli different da l'imni actual. Ella cumenza cun bler schlantsch e mida lura dentant entamez en in Moll; quai che saja plitost agen. Er haja quai ina fermata amez; quai che possia lura chaschunar problems da chantar.

Il final è ils 12 da settember durant la festa da musica populara ad Aarau. Il finalist vegn tschernì live en l'emissiun «Potzmusig» sin SRF1.