Siglir tar il cuntegn

Svizra Ils giuvenils han propostas per midar la Svizra

Ils giuvenils han inoltrà prest 300 propostas per meglierar la Svizra en connex cun la campagna «mida la Svizra». Ils 14 pli giuvens cussegliers naziunals e dals chantuns elegian uss mintgamai ina proposta e posiziuneschan quella en la politica naziunala.

Plattafurma.
Legenda: La plattafurma resta er suenter la fin da la campagna activa. RTR, Nora Baltermia

En il rom da la campagna «mida la Svizra» han ils giuvenils dapi ils 19 da favrer gì la chaschun d'inoltrar propostas co meglierar la Svizra. Quai sur ina plattafurma da l’uniun tetgala dals parlaments da giuventetgna en Svizra.

Egualitad: in tema central

Enfin uss èn 300 propostas vegnidas ensemen. Ina gronda part tractia temas socials sco l'egualitad dad um e dunna. Uschia pretendan ils giuvenils svizzers per exempel, ch'il congedi da paternitad vegnia prolungà, ubain che las dunnas stoppian er far militar.

Quasi eguala è stada la participaziun a la campagna: Uschia èn 51,8% dals participants dunnas e 48,2% umens. Cunzunt giuvenils da las regiuns tudestgas èn vegnids activs.

Uss èsi en ils mauns dals giuvens politichers

Da las 300 propostas filtreschan ils 14 parlamentaris ils pli giuvens lur proposta favurita. E lura vali da posiziunar quella en la politica naziunala.

Ils 25 da mars va la campagna a fin. La plattafurma per inoltrar propostas resta però er suenter la campagna activa.

RR novitads 12:00