Siglir tar il cuntegn

Header

cuntegn

Svizra Ils giuvens en Svizra midan savens lur dachasa

Svizras e Svizzers midan savens lur dachasa surtut sch'els èn giuvens. Persunas pli veglias però restan pli savens fidaivlas a lur lieu da domicil, quai tenor in studi dal portal d'immobiglias Homegate.

Da las persunas che vivan en Svizra han 15% midà domicil aifer l'ultim in onn e mez. Dals giuvens tranter 15 e 29 onns èn quai prest in terz. En la categoria tranter 60 e 79 onns percunter èn quai be 4%.

Per gronda part èn midadas en famiglia u da la professiun il motiv per ina midada dal dachasa. 44% dals dumandads han inditgà ina midada da la situaziun da vita sco motiv per la dischlocada e 18% la professiun.

Criteris per ina nova abitaziun

Sin la tschertga d'ina abitaziun vegn primarmain guardà sin il pretsch, suandà dal lieu e lura dal dumber da las stanzas. Dentant era il temp da viadi tar la plazza da lavur e la colliaziun dals meds publics sajan criteris impurtants tar la tschertga d'ina nova abitaziun. Ils meds publics èn oravant tut per las persunas giuvnas in criteri impurtant.

Persunas pli veglias restan fidaivlas al lieu da dimora

Tenor il studi da Homgate è la Svizra anc adina in pajais da locataris. Trais quarts dals dumandads han midà in'abitaziun affittada e be 16% d'ina proprietad d'abitar. E persunas pli veglias restan tar la midada dal dachasa fidaivlas al lieu da dimora. Tar las persunas tranter 60 fin 89 onns restan 43% e tar las persunas tranter 45 fin 59 onns schizunt 51% fidaivlas al lieu da dimora.

RR novitads 12:00

Artitgels legids il pli savens