I dat differents cussegls ch'ins po resguardar sch'ins e pertutgà d'ina allergia da pollens. Sch'ins va ordavert, cunzunt cura ch'igl è bell'aura e sufla, lura sgolan ils pollens en l'aria. Savens sa ferman els era en ils chavels e vid la vestgadira. Perquai:
- far la duscha e lavar ils chavels la saira enstagl la damaun marvegl
- betg laschar la vestgadira purtada en la chombra da durmir, mabain trair or ella en il bogn
- betg pender si la vestgadira giuadora per laschar sientar
- betg dar aria memia ditg a l'abitaziun
- far sport ordavert gist suenter ch'igl ha pluvì e betg cura ch'i dat suelgl u sufla
Quels tips èn pli probabel enconuschents als blers. Ma ins po era anc ir in u l'atuer pass vinavant:
- Ins po installar in filter da pollens en l'auto. Quel ston ins dentant mantegnair bain per ch'el fetschia l'effect giavischà.
- Egliers da sulegl ch'èn er anc serrads da la vart pon proteger ils egls dals pollen. Sch'ins porta pli gugent lentas, lura da quellas dal di perquai ch'ils pollen pon era tatgar vidlonder.
- Ins po evitar nutriment che cuntegn bler istamin. Quel po numnadamain rinforzar ils sintoms. Vin cotschen, tomatas, chaschiel madir e charn fimnentada cuntegnan bler istamin.
- Tge ch'ins po prender cunter murdim u inflammaziuns è ieli da puletg nair (Schwarzkümmelöl). Plinavant pon ins mangiar maila, agl u tschagulas che cuntegnan querzetin. E querzetin, gliez fa ch'il corp na producescha betg tant istamin.
Sch'ins vul cumbatter l'allergia sezza datti la pussaivladad da «desensibilisar» il corp:
Tar quella terapia vegn sprizzà ils allergens – pia quai ch'ins è allergic encunter – per ch'il sistem d'immun s'endisia. «Desensibilisar» pon ins era cun allergens en furma da tablettas u daguts. Quella terapia cuzza circa trais onns e sche tut gartegia, po l'allergia vegnir bler pli flaivla u schizunt svanir dal tut.