18 dals 28 commembers da l'UE han vuschà per la proposta d'ina cumissiun da l'UE, uschia ina pledadra da l'autoritad.
Da 10 a 5 onns
Oriundamain aveva la cumissiun da l'EU proclamà ina prolungaziun da la licenza da 10 onns. Quai na han ils commembers da l'EU dentant betg sustegnì. Il proceder ha sa stratg sur plirs mais cunquai che tuttas duas varts n'avevan betg avunda aderents. Uschia ha la cumissiun stuì sminuir la prolungaziun per la licenza actuala che scroda ils 15 da december sin tschintg onns.
Ina chemicalia dispitaivla
Sin las cultiras fan ins gia 40 onns diever da glifosat. Il diever è dentant cuntravers. In studi da l'Organisaziun mundiala da la sanadad (OMS) classifitgescha che la chemicalia chaschuna probablamain cancer. Auters studis sco era las agenturas da l'UE na conferman dentant betg quest suspect.
Ina prolungaziun è dentant betg mo impurtanta per l'agricultura e per consuments, mabain era per il gigant da chemia Bayer che vul surprender l'inventader da glifosat Monsanto per 60 milliardas francs.
RR novitads 17:00
