Siglir tar il cuntegn

Header

cuntegn

Svizra Ils rabats tar las franschisas restan

Tar las franschisas da las cassas da malsauns resta per il mument tut sco fin qua. Il parlament federal ha franà ils plans dal Cussegl federal da far main attractivas las franchisas da 1'000 fin 2'500 francs ad onn e pli attractivas las bassas franschisas.

Il Cussegl dals chantuns ha approvà la gievgia ina moziun cun la pretensiun da betg midar ils rabats per las franschisas. Il Cussegl naziunal aveva approvà il december ina moziun cun il medem cuntegn.

Rabats maximals da 1'540 francs

Oz dastga ina cassa da malsauns mintg'onn dar in rabat maximal da 1'540 francs per franschisas da 2'500 francs. Quest rabat vuleva il Cussegl federal sbassar sin 1'100 francs. Tar ina franschisa da 50 francs vegn la premia annuala oz sin il pli 140 francs pli bunmartgada. Quest rabat avess gì da vegnir augmentà sin 160 francs.

Cun questa midada vuleva il Cussegl federal pussibilitar in'elecziun. Oz èn be las pli autas u las pli bassa franschisas attractivas. Il minister da sanadad Alain Berset ha crititgà las moziuns. Quellas cementeschian in sistem economic che na saja betg effizient.

Promover l'atgna responsabladad

Ils cussegls persequiteschan però in'autra finamira: La dumonda saja, sch'ins possia chastiar persunas che sajan prontas da surpigliar dapli responsabladad. L'atgna responsabladad saja impurtanta per che las prestaziuns da sanadad restian er en l'avegnir pajablas, uschia il pledader da la cumissiun Joachim Eder da la PLD.

Questa decisiun na munta però betg che las franschias restan sco fin qua. Il december aveva il Cussegl naziunal decidì che tant las franschisas minimalas però er las maximalas duajan crescher. Uschia vul el cuntanscher ch'ils assicurads sa cumportan pli conscient tar la sanadad ed ils custs.

Franschisa

Avrir la box Serrar la box

La franschisa è la cumpart ch'ils assicuraders surpiglian vi dals servetschs medicinals. Sche quels surpassan la franschisa aifer in onn, surpiglia la cassa da malsauns ils ulteriurs custs.

La regla è: Pli auta la franschisa e pli bassa la premia meinsila.

RR novitads 15:00

Artitgels legids il pli savens