Dapi la crisa da finanzas avant 10 onns è la facultad dals 300 pli ritgs en Svizra creschida mintg'onn en media per 28 milliardas francs. Quest onn è l'augment total stà pli pitschen, numnadamain anc 1,7 milliardas francs. Quai ha publitgà la revista «Bilanz».
Famiglia dal fundatur dad Ikea vinavant top
Ensemen han ils 300 pli ritgs ina facultad da 675 milliardas francs. Per vegnir tranter questas 300 persunas dovri almain ina facultad da 100 milliuns francs. Il numer 1 dals ritgs en Svizra è anc adina la famiglia dad Ingvar Kamprad dal fundatur dad Ikea cun in possess da 50 fin 51 milliardas francs. Vinavant tranter ils pli ritgs sa chattan ils artavels da Roche, las famiglias basilaisas Hoffmann ed Oeri. Ellas possedan bun 25 milliardas francs.
Betg pli tranter ils «top 10» figurescha tenor «Bilanz» la famiglia Blocher.
La facultad dals superritgs s'augmenta
Sch'ins guarda sin la facultad dals 300 pli ritgs dapi l'onn 1989, è quella s'augmentada trais giadas dapli ch'il product interiur brut (BIP) da la Svizra. Vegniss lur facultad repartida sin l'entira populaziun da la Svizra, survegniss mintg'abitant 79'400 francs.
RR novitads 22:00
