La Spagna saja in pajais cun ina bellezza mar ed cun amicabla glieud, di Bianca Schmidt, pledadra da medias tar il biro da viadis TUI.
In motiv per la popularitad da la Spagna è dentant era la segirtad. Destinaziuns sco la Tirchia u la Tunesia n'èn pervia dils acts da terror betg dumandadas quest onn.
La Spagna saja perquai la perfetg’alternativa, di Jessica Maissen, dal biro da viadis Capricorn a Glion.
Destinaziun da surpraisa
Natiralmain - destinaziuns sco l’Italia, la Grezia u la Cipra èn era dumandadas il 2016.
Mo i dat era surpraisas. Quest onn saja spezialmain era la Bulgaria dumandada, di Renate Reinbacher dal biro da viadis ATR Tours a Scuol e Samedan. La Bulgaria saja ina buna alternativa per quels che veglian spargnar in pau.
Na betg mo sper la mar
En moda èn dentant quest onn er vacanzas na betg sper la mar. Spezialmain la Scandinavia cun tiaras sco la Svezia, la Finlanda u la Norvegia èn el trend. Durant il temps da stad sclereschi il sulegl en Scandinavia bunamain 24 uras al di. Quai saja insatge fitg spezial, di Prisca Huguenin, pledadra da medias da Hotelplan Suisse.