Siglir tar il cuntegn

Header

cuntegn

Svizra Ils urs da Berna èn en vacanzas

Betg mo nus umans faschain vacanzas da stad. Era ils 3 urs da Berna èn actualmain en vacanzas en in parc dad urs a Vallorbe. Dentant betg per sa revegnir, mabain pervia da lavurs da construcziun en il parc dad urs.

Dad ina vart sto il mir sisum il parc vegnir sanà. Tenor il manader dal parc, Peter Schlup, haja quai dà in sbagl tar la construcziun avant 6 onns che stoppia ussa vegnir curregì. Da l'autra vart vegnia fabritgà ina pitschna funiculara per sutgas cun rodas e charrotschas d'uffants.

Trist da vesair il parc vid

Per Peter Schlup èsi curius, bunamain in pau trist da vesair il parc vid. I saja però era ina grondiusa pussaivladad da far pli attractiv il parc. Uschia èn vegnidas plantadas ina massa novas plantas e chaglias, i vegn installà ina sbalunzia en il bogn ed insumma creà dapli occupaziuns per ils urs.

audio
Bunura: Visita guidada tras il parc dad urs a Berna
ord Actualitad dals 19.05.2015.
laschar ir. Durada: 5 minutas 15 Secundas.

In sguard davos las culissas

Durant questa stad èsi perquai pussaivel dad ir en il parc sco visitader e da dar in sguard davos las culissas. Ins po damai rampignar si e giu las costas stipas, sa ruschnar en ils cuvels d'enviern ni sa sentir sco in urs en il foss dad urs.

La fin da settember surprendan lura puspè Finn, Björk e lur figlia Ursina il zepter en il parc. Lura turnan ils trais urs numnadamain puspè en lur parc amez la chapitala da la Svizra.

Artitgels legids il pli savens