Il decurs dal 2020 pajan Svizzers e Svizras quest onn cartaivel puspè pli pauc tschains da locaziun. La plattafurma Immoscout 24 è da l'avis ch'il tschains da locaziun sa sbassa quest onn tendenzialmain, cunzunt ordaifer dals uschenumnads «hotspots», sco per exempel Turitg u Genevra. La raschun saja che novas chasas da pliras famiglias vegnian construidas.
L’onn passà sajan ils tschains da locaziun sa reducids per 0,5% en media, cumpareglià cun l’onn avant. Cunzunt il mais da december haja contribuì a quest svilup.
- En la Svizra Centrala (-1,7%), en la regiun dal Lai da Genevra (-1,1%) ed en il Nordvest da la Svizra (-0,9%) èn ils tschains da locaziun sa sbassads.
- En il Tessin (+1,9%), Svizra Bassa (Mittelland) (0,8%), en la regiun gronda enturn Turitg (+0,6%) sco er en la Svizra Orientala (+0,3%) èsi vegnì pli char d'abitar a tschains.
Proprietad d'abitar è e resta char
Tgi ch'ha cumprà proprietad d'abitar ha stuì prender dapli daners enta maun. Quai trend cuntracurrent pudess cuntinuar il 2020. La raschun è il svilup dal tschains e da l'economia. Chasas d'ina famiglia èn stadas inseradas la fin da l'onn 2019 cun in pretsch 2,8% pli aut che anc l'entschatta da l'onn. Il pretsch d'abitaziuns da proprietad è creschì per 0,4%.
RTR novitads 10:00