Siglir tar il cuntegn

Header

cuntegn

Immobiglias Jelmoli serra la fin dal 2024 sias portas

Ina da las pli veglias chasas da cumpra da la Svizra serra sias portas cun la fin dal 2024. Il Jelmoli a la via da la staziun a Turitg, svanescha en sia furma sco quai ch'el exista oz. Quai communitgescha la possessura dal Jelmoli, la firma d'immobiglias Swiss Prime Site.

Da la serrada sajan pertutgadas tut en tut 850 collavuraturas e collavuraturs, ha ditg in pledader da l'interpresa envers SRF. Il bajetg duai vegnir renovà cumplettamain. Dasper surfatschas da biro, duai er dar purschidas gastronomicas. Sulet las emprimas duas auzadas duain restar surfatscha per butias. Reconstruir l'edifizi vul Swiss Prime Site (SPS) dal 2025 fin il 2027.

Betg chattà cumprader per Jelmoli

SPS ha tschertgà insatgi che surpigliass la marca da stizun, dentant betg l'edifizi da Jelmoli a Turitg. Blers discurs intensivs n'hajan dentant betg purtà il resultat giavischà, hai num en la communicaziun. Ina raschun saja la surfatscha gronda da total 24'000 meters quadrats da Jelmoli. Per ils interessents saja quella stada memia gronda – ina tala grondezza na correspundia ozendi betg pli a la norma, damai ch'i vegnia cumprà pli bler online.

Er butias da Jelmoli a l'eroport serran

Dasper l'edifizi principal a la via da la staziun, ha Jelmoli er in magasin ad Otelfingen e duas filialas a l'eroport da Turitg. Tenor il pledader vegnan er quels serrads cun la fin dal 2024. Ils contracts na vegnan betg prolungads. Il 2019 aveva Jelmoli anc sa cumprà en en il bajetg da prestige «The Circle» a l'eroport. Ma curt suenter l'avertura è la pandemia da corona vegnida. Suenter la pandemia ha la vendita online franà las cifras. Uschia n'ha la butia nova betg gì l'effect giavischà.

audio
Per tadlar: las novitads da las 12:00
ord RTR Audio dals 06.02.2023.
laschar ir. Durada: 5 minutas 14 Secundas.

RTR novitads 11:00

Artitgels legids il pli savens