Il text rumantsch entschaiva cun ils pleds «Sin funs cotschen ina crusch». Medemamain datti la proposta per in nov imni naziunal er en franzos e talian.
La chanzun victura è vegnida elegida da la publicitad via internet, sms e telefon. Il final da la tscherna è stà sonda passada en rom da l'emissiun «Potzmusig» da la Televisiun svizra. La chanzun victura deriva or da la plima dad in econom e musicist da Zollikerberg en il chantun Turitg.
Per dapli acceptanza
Lantschà la concurrenza per in nov imni naziunal ha la Societad svizra d'utilitad publica (SGG SSUP). Il nov text duai procurar per dapli acceptanza tar la populaziun e correspunder meglier a las valurs formuladas en la constituziun svizra dal 1999.