Las pussaivladads preventivas da la polizia per cumbatter il terrorissem duajan vegnir rinforzadas. La finamira è da impedir la partenza da persunas en il Dschihad. Il Cussegl federal ha uss incumbensà il departament da giustia e polizia dad elavurar ina proposta da consultaziun per ina lescha correspundenta.
Ozendi na datti nagina basa legala per impedir a simpatisants dal Dschihad da bandunar la Svizra. En futur duajan tals simpatisants vegnir obligads da s’annunziar regularmain tar la polizia. Sche questa mesira n’ha nagin effect alura duajan ils documents da viadi vegnir serrads.
Privel da terror ni sulet interess
Las autoritads duajan da cas tar cas decider sche quai dat in privel da terror ni sche quai regia sulet in interess vida talas gruppaziuns, scriva il Cussegl federal. Era duajan ils interess da la Svizra vegnir resguardads uschia èsi impurtant dad impedir l’export da terrorissem ord la Svizra en l’exteriur, ma er d’impedir acts da terror en Svizra.
Registraziun zuppada da persunas
Il Cussegl federal vul uss pussibilitar al uffizi federal da polizia da scriver ora persunas cun ina registraziun zuppada. Uschia pon ils viadis da las persunas vegnir controllads senza che quellas san insatge. Al uffizi da polizia vegn annunzià sche la persuna vegn controllada tar ina entrada en il territori da Schengen. Questas mesiras valan be sche la persuna è in privel concret per la segirtad en l’exteriur ma surtut en Svizra.
RR novitads 14:00