Siglir tar il cuntegn

Header

cuntegn

Implant militar Uniuns d'ambient protestan cunter engrondiment al Simplon

Differentas uniuns d'ambient fan recurs cunter l'engrondiment planisà da l'implant militar al Simplon en il Vallais. Il rapport che demussia ch'il project saja supportabel per l'ambient è en lur egls manglus.

Il Departament federal da defensiun, protecziun da la populaziun e sport VBS vul engrondir l'implant militar al pass dal Simplon per 30 milliuns francs. Il parlament ha gia approvà il credit en il program d'immobiglias.

Rapport da supportabladad manglus

Ils novs bajetgs sajan planisads en ina zona sensibla, scrivan las uniuns d'ambient Pro Natura, l'Associaziun svizra per la protecziun d'utschels / BirdLife svizra e WWF en in recurs, inoltrà a la vischnanca da Simplon. En il rapport davart da supportabladad manchia ina valitaziun precisa da las consequenzas dals bajetgs ed il manaschi sin la flora e fauna da la regiun autalpina.

Il VBS sa basia sin datas manglusas e na sappia perquai betg valitar tge sorts protegidas che svanissan u vegnissan impedidas entras il diever da la plazza da sajettar. Plinavant mussia il rapport cleramain che las limitas da canera vegnian surpassadas. Ils novs bajetgs sajan plinavant planisads en ina planira amez prads d'alp. Quai cuntrafetschia a la lescha da planisaziun dal territori che di ch'ins duai bajegiar a moda pli concentrada.

Plazza da tir al Simplon

Avrir la box Serrar la box

La plazza da tir al Simplon giascha en ina regiun alpina tranter 1'850 e 3'000 meters sur mar. El cumpiglia abitadis protegids e sorts d'animals e da plantas periclitadas.

Plinavant è la zona ina dad IBA, pia ina zona impurtanta per utschels e biodiversitad. Lur finamira principala è la protecziun d'ina rait mundiala da zonas che duai segirar il surviver da la populaziun d'utschels e da sorts protegidas.

RR novitads 06:00

Artitgels legids il pli savens