Implants solars en las Alps pon producir l'enviern 4 giadas uschè blera energia sco implants da la medema grondezza en la Bassa. Quai giascha tranter auter er vi da la naiv che lubescha da duvrar implants «bifazials» che funcziunan sin duas varts. Quai n'è betg pussaivel en la Bassa.
Perscrutaders da la Scol'auta turitgaisa per scienzas applitgadas ZHAW han cumpareglià las datas d'in implant a Tavau sin 2'500 meters sur mar cun in implant sin in tetg a Wädenswil en il chantun Turitg.
Da l'october fin il mars saja la producziun d'energia tar l'implant da Tavau stada trais fin quatter giadas pli auta che quella a Wädenswil. La prestaziun da l'implant dependa tranter auter da la temperatura: pli fraid ch'igl è, e pli auta la prestaziun. Ed en ils auts datti er dapli reflecziun tras la naiv, ch'augmenta la racolta d'energia solara, cunzunt cun in implant bifazial. En la Bassa na fetschia uschè in modul nagin senn, scrivan ils scienziads e las scienziadas da la ZHAW.