Siglir tar il cuntegn

Header

audio
Frajas gia uss – è quai ecologic?
Or da Actualitad dals 09.04.2022.
abspielen. Laufzeit 3 minutas.
cuntegn

Import da fritgs Cumprar frajas gia l'avrigl – è quai ecologic?

Ins possia cumprar las frajas da la Spagna senza avair schletta conscienzia, scriva la Migros. Gie, la bilantscha da C02 e meglra che quella da frajas svizras ord la serra. Ma èn ellas propi uschè ecologicas sco i vegn ditg?

Damai che las serras dovran bler ieli u gas per stgaudar, han las frajas da la Svizra ina pli schletta bilantscha da C02 che quellas importadas da la Spagna. Quai conferma era Silvia Meyer da l’organisaziun d'ambient WWF envers SRF. Dentant na vai betg mo per la bilantscha da C02, mabain era per las circumstanzas sut las qualas las frajas vegnan producidas. E là vesa Silvia Meyer il proxim problem:

La gronda part da las frajas derivan da la regiun Huelva en la Spagna. En quella regiun datti in massiv problem d'aua. I dat bleras plantaschas da frajas illegalas ed era l'aua na vegn per part betg duvrada correctamain.
Autur: Silvia Meyer da l'organisaziun d'ambient WWF

E sch'ins pensa ch'i dovra circa ina bognera aua per in pac frajas, lura è quai problematic sche quell'aua vegn tratga giu illegalmain. SRF ha vulì savair tge che la Migros, sco vendidra da frajas da Spagna, di tar quai fatg. Il pledader da medias Patrick Stöpper conferma, ch’els controlleschian fitg bain, danunder che las frajas derivian:

Nus avain ina firma d'audit che controllescha sche las frajas derivan d'ina plantascha legala e sche l'aua vegn duvrada correctamain.
Autur: Patrick Stöppel plidader da medias da la Migros

Schizunt persunal da la Migros sezza, giaja en Spagna per guardar che tut saja correct. Bun ed endretg, ins na possia dentant betg snegar che la Spagna pateschia sut mancanza d’aua, di Alexandra Gavilano da Greenpeace, in’autra organisaziun d’ambient. Ord uschè ina regiun importian ins simplamain naginas frajas, manegia ella.

Vista sociala

Patrick Stöpper da la Migros argumentescha qua ord vista sociala e metta en dumonda, sch'i fissi propi gidà a la glieud en Spagna sch'ins chalia d'importar las frajas. Huelva saja ina regiun economica nua ch'i saja impurtant da pudair cultivar frajas. E la Migros garanteschia che quai vegnis fatg a moda ecologica cun buns standards socials, di Patrick Stöppel.

Uschè u uschia, la fin sto mintgin decider sez tge frajas ch'el u ella vul cumprar. Per tgi che ha dentant anc in zichel pazienza datti bainbaud era frajas creschidas sin plantaschas svizras. La stagiun cumenza tar nus numnadamain en bun in mais.

RTR actualitad 07:00

Artitgels legids il pli savens

Scrollar a sanestra Scrollar a dretga