Las interpresas da construcziun svizras han l'emprim mez onn 2016 puspè gì marcantamain dapli lavur. Cumpareglià cun l'emprim semester da l'onn passà, haja il sectur da construcziun fatg 5,4% dapli svieuta, communitgescha l'Uniun svizra dals impressaris. En tut correspunda quai a la summa da 9 milliardas francs.
Dapli lavur haja quai dà en l'entir sectur da la construcziun auta (+6,7%), in pau damain tar la construcziun bassa (+4,2%). L'uschènumnada «Baisse» da l'onn 2015 saja cunquai surmuntada. Il nivel da record dal 2014 na saja però betg anc cuntanschì.
Tenor impressaris però vistas mediocras
L'uniun dals impressaris en Svizra quinta che quest svilup positiv cuntinueschia. Quest quartal current vegnian las svieutas il pli probabel era a crescher, cunquai che las pustaziuns creschian era.
A media vista quintan ils impressaris svizzers però cun svilup negativ. La quota d'abitaziuns vidas vegnia a crescher tras damain immigraziun, quai che frainia la dumonda da bajegiar novas abitaziuns. Da l'autra vart perdian abitaziuns l'attractivadad sco object per investiziuns, perquai che la rendita vegnia a sa sminuir.
RR novitads 10:00