Suenter in lung temp sitg è la naiv arrivada en il Grischun. Quella procura per bels maletgs ma er per privel da lavinas ed impediments sin via.
Bellas cuvertas da naiv
Cunzunt il Vallais ha survegnì blera naiv ils davos dis. Sco SRF Meteo communitgescha, hai dà là aifer 24 uras fin la sonda en damaun per part fin ad in mez meter naiv – uschia a Zermatt e sin il pass dal Grond Son Bernard. Vis sur ils davos dis èsi perfin in quantum da naiv da radund in meter.
Privel considerabel en parts dal Grischun
Per il Grischun dal Nord ed il Grischun Central vala actualmain in privel da lavinas considerabel – stgalim 3 da 5, tenor l’Institut da naiv e lavinas a Tavau. Er en las ulteriuras regiuns da las Alps svizras è il stgalim da privel uss tar 3. La sonda e la dumengia valeva per il Vallais e per ils culms bernais in privel da lavinas grond.
En il chantun Vallais èn duas persunas mortas la sonda. Ellas èn vegnidas en ina lavina ordaifer las pistas marcadas en la regiun dals Scex Blanc sur Bruson.
Las vias grischunas puspè senza naiv, quasi
Sulet anc per il pass dal Lucmagn annunzia il chantun la dumengia vers saira, che la via saja cuverta cun naiv.
La sonda è il traject da la Viafier Matterhorn Gottard tranter Täsch e Zermatt stà serrà per bleras uras, suenter ch'ina lavina era vegnida giu. Ils lavurers hajan lura stuì spetgar cun rumir, fin che ulteriura naiv era siglientada giu da las plauncas.
Problems da traffic hai era dà la sonda sin las vias, uschia sin l'autostrada A2 tranter Erstfeld ed Amsteg en direcziun sid. La polizia ha retegnì il traffic per pudair rumir la naiv, e per gidar automobilists ch'eran stads bloccads tranter Amsteg e Göschenen.