Impuls concrets per meglierar la situaziun dals fugitivs

Ministers da pajais africans ed europeics han deliberà ina decleranza davart la protecziun da fugitivs. Sco emprima finamira vul ins meglierar la situaziun en la Libia.

La gruppa da contact per la Mar Mediterrana unida tar la conferenza da fugitivs. Bild in Lightbox öffnen.

Legenda da maletgs: Conferenza da fugitivs La gruppa da contact per la Mar Mediterrana. Keystone

Ministers da pajais africans ed europeics vulan sa metter en per la protecziun da dretgs da fugitivs sin la ruta mediterrana. Sin quai èn els sa cunvegnids en ina conferenza a Berna.

La «Gruppa da contact per la Mar Mediterrana» è naschida per iniziativa dal minister da l'intern talian, cura che fugitivs arrivavan mintga di en l'Italia. Actualmain hai pli paucs. Ma tschient millis da fugitivs sa chattan en la Libia. E diesch millis vegnan tegnids ferm en centers d'arrestaziun sut cundiziuns indegnas d'in uman. Soluziuns spertas èn betg en vista. Ina meglieraziun saja mo pussaivla, sch'i reusseschia a la communitad da stadis da stabilisar la Libia politicamain, ha la cussegliera federala Simonetta Sommaruga ditg a las medias. A curta vista hajan ins da far il pussaivel per la protecziun da fugitivs e migrants. E quai è sta l'aspect central da la conferenza. Enfin ussa saja la finamira stada da tegnair davent ils fugitivs da l'Europa e la protecziun saja uschia vegnida a la curta.

Impuls concrets

La gruppa da contact n'ha betg fatg decisiuns, dentant ha ella mess impuls. E la decleraziun publitgada glindesdi è pli concreta che quellas avant:

  • L'emprima finamira è da meglierar la situaziun en ils centers d'arrestaziun. Persunas vulnerablas, cunzunt uffants, duain pudair bandunar ils centers. Plinavant duain organisaziuns internaziunalas avair access a tut ils center sin la ruta mediterrana, per garantir ch'ils dretgs umans vegnian respectads.
  • Segunda prioritad ha il sustegn en cas d'in return voluntari. Ils servetschs consulars en ils pajais da transit ed ils pajas d'origin duain vegnir rinforzads per che quels sappian proteger ils fugitivs.
  • La gruppa da contact ha pledà per vias da fugia e migraziun segiras. Concret ina translocaziun en l'Europa. Per pussibilitar quai duain ils pajais da l'Uniun europeica metter a disposiziun 50'000 plazs per fugitivs uffizials.
  • In'autra finamira è da cumbatter ils motivs per migraziun. Sommaruga ha fatg attent ch'i dettia anc adina concerns ch'exploteschian la ritgezza africana senza che l'economia e la populaziun africana profiteschia. Er cunter quai saja da cumbatter. Ma betg mo la situaziun economica, era la midada da clima saja in motiv da fugia, ha il minister da Mali Abdramane Sylle constatà. En intginas parts dal pajais haja quest onn anc betg pluvì.

RR novitads 16:00