Siglir tar il cuntegn

Header

Reto Nause
Legenda: Anc decis nagut: Reto Nause ha actualmain be exprimì ses interess per il presidi da la PCD. Keystone
cuntegn

Svizra In Bernais vul forsa daventar president da la PCD

Fin uss valeva il cusseglier naziunal dal chantun Zug Gerhard Pfister sco sulet candidat per il presidi da la PCD Svizra. Eventualmain survegn el uss concurrenza: il directur da segirezza da la citad Berna Reto Nause vul examinar in’atgna candidatura per il post.

Reto Nause ha ditg a la «NZZ am Sonntag», ch’el haja contact cun la cumissiun correspundenta. Plinavant discurria el er cun ses conturn bernais. Fin uss n’haja el dentant anc betg prendì ina decisiun – ni per ni encunter ina candidatura.

La crux per Nause: cumbinar dus posts

Nause ha gia bler’experientscha da partida: avant si’elecziun en la regenza da la citad Berna era el secretari general da la PCD Svizra. Il 1999 è el stà responsabel per il cumbat electoral da la cussegliera naziunala vertenta Doris Leuthard.

Il politicher bernais Nause (44) è parsura da la direcziun da segirezza. Uss sto el ponderar, co e sche el pudess cumbinar ses uffizi executiv cun il presidi da la Partida cristiandemocratica.

Stgara schelta da successurs

Suenter ch’il cusseglier dals chantuns dal Soloturn Pirmin Bischoff ed il cusseglier naziunal dal Grischun Martin Candinas na candideschan betg per il post, valeva Gerhard Pfister (53) sco unic candidat per il presidi.

La PCD dovra in nov president perquai che Christophe Darbellay sa retira sco president da partida suenter 10 onns.

Dar cuntrapais a Pfister

Il cusseglier naziunal vallesan Yannik Buttet candidescha sco vicepresident da la PCD. Quai succedia cunzunt en l'interess da la partida, ha ditg Buttet visavi la gasetta «Le Matin».

Buttet vesa sasez sco cuntrapais a Gerhard Pfister. Cun Pfister sco president dettia quai il risico che la partida s'avischinia a la Partida populara svizra. Reto Nause percunter vala sco represchentant dal mez.

La decisiun en chaussa datti lura ils 23 d’avrigl.

RR novitads 12:00

Artitgels legids il pli savens

Scrollar a sanestra Scrollar a dretga