Il pli grond concern da telecom Svizzer ha fatg in gudogn da 1,3 milliardas francs. Quai è in tschintgavel damain che l'onn avant. Tranter auter ha in chasti da la Weko da 186 milliuns francs smatgà il gudogn. La Weko aveva punì la Swisscom perquai che lezza aveva dà a fit a la concurrenza enfin il 2007 lingias dad ADSL per in pretsch exagerà. Entras quai avevan ils concurrents betg pudì far avunda gudogn.
Malduvrà la posiziun da monopol
Tenor la cumissiun da concurrenza aveva la Swisscom malduvrà sia posiziun da monopol en il sectur da spectrum lartg. L'examinaziun era vegnida instradada sin basa d'ina accusaziun d'in purschider da telecommunicaziun.
La Swisscom refusa tut las rinfatschas ed ha annunzià da trair vinavant il cas avant il Tribunal federal.
Plazzas da lavur periclitadas
Suenter la novitad da la sminuziun marcanta dal gudogn è vegnì enconuschent che la Swisscom planisescha da stritgar radund 700 plazzas da lavur. Quai dentant sulet en il cas il pli nausch, ha ditg il schef da finanzas Mario Rossi a l'ur da la conferenza da medias da la Swisscom. Els veglian nizzegiar la fluctuaziun natirala e da porscher in'autra plazza en in'autra sparta.
Vitiers serra la Swisscom 6 dals 14 callcenters, là na datti dentant nagina reducziun da plazzas. Il callcenter da Cuira resta en funcziun, e tut tenor basegn vegn il dumber da persunal perfin augmentà, sco la Swisscom scriva. Serrads vegnan ils centers da Turitg, Berna, Basilea, Genevra, Lucerna e Rapperswil.
RR novitads 8:00/16:00