Siglir tar il cuntegn
Inhalt

Svizra In impurtant signal, dentant...

L'iniziativa No Billag saja stada memia radicala e perquai saja il cler Na dal suveran svizzer in impurtant signal. En quest punct èn ils commentaders da las gasettas d'accord. Tuts pretendan dentant era che la SSR SRG realiseschia refurmas per l'avegnir.

Gasettas cun lingias grassas davart No Billag.
Legenda: Reacziuns suenter il Na a No Billag. RTR, Onna Riedi

Las refurmas che la SSR SRG haja annunzià la dumengia giajan en la dretga direcziun, uschia il tenor en las gasettas.

«E tuttina ina carta melna per la SSR SRG»

Dad in «di allegraivel per il Grischun e la Svizra rumantscha» scriva La Quotidiana. L'iniziativa No Billag avess gì in effect desastrus per las regiuns muntagnardas e las minoritads linguisticas. Tuttina: La SSR SRG stoppia sa focussar sin sia incarica primara d'infurmaziun.

«Ein gut investierter Franken»

Il suveran svizzer haja votà cun saun giudizi, scriva la Südostschweiz. Per l'avegnir na dovria betg be refurmas, mabain era infurmaziuns co che las medias lavurian.

«Die Zeit der generalversorgenden Gemischtwarenhändler, die sich aus Gebühren finanzieren geht zu Ende»

La SSR SRG duai sa concentrar sin transmetter infurmaziuns relevantas ord infurmaziun, politica e cultura – commentescha la NZZ. Las refurmas annunziadas dumengia sajan anc memia pauc precisas.

Er fissi pli perdert da en in emprim pass discussiunar l'incumbensa da la SSR SRG e lura er ponderar con finanziar quella. Quai avant che sa dispitar davart quant che mintga chasada duai pajar per radio e televisiun. Sche quest model da finanziaziun perdia simpatia, fissi tenor il commentader da la NZZ er da ponderar sch'ils daners duain vegnir ord la chascha da la Confederaziun.

«Et maintenant au travail»

Il cler Na a No Billag na duai betg zuppentar che blers na sajan betg propi cuntents cun il servic public actual, manegia «Le Matin».

«Ina schuppa tievia»

La discussiun davart l’iniziativa No Billag ed era la decisiun dal suveran svizzer è vegni persequità sur ils cunfins svizzers ora. Era en l’exteriur datti opposiziun cunter las taxas da recepziun. Per Thomas Bellut, l’intendant dal ZDF han ils Svizzers plazzà ina noda positiva, in signal che fetschia curaschi.

Las emoziuns èn sa stgaudadas avant la votaziun, il resultat è dentant cler. Ina schuppa tievia numna la Kleinezeitung l’iniziativa No Billag. Gernot Blümel, il minister da medias austriac spera, che la debatta en Svizra dettia in impuls en l’Austria per ina discussiun vaira ed objectiva davart la politica da medias en sia patria.

RR actualitad 06.00