Part centrala da la nova lingia duai esser in tunnel da 22 km lunghezza, quai communitgeschan ils chantuns Berna e Vallais, la Viafier Grimsel SA e Swissgrid. La societad da la rait svizra Swissgrid vul era nizzegiar il tunnel per trair lingias d'auta tensiun tras quel.
Ils chantuns Berna e Vallais quintan ch’il project haja era in effect sin il turissem. Ina viafier tras la Grimsel colliass las regiuns turisticas da plirs chantuns. Uschia da Montreux e Lucerna tras la Part sura bernaisa en il Vallais ed en il Grischun.
In studi è avant maun
In studi davart la realisabladad fatg en incumbensa dals chantuns Berna, Vallais ed Uri ensemen cun ulteriurs partenaris mussia, ch’il project saja realistic e che sinergias tranter viafier e lingias da tensiun fetschian senn, scrivan ils partenaris involvids vinavant. Swissgrid sto schlargiar fin l’onn 2025 sias capacitads da transportar energia en questa regiun.
L'onn 2018 vulan ils partenaris involvids inoltrar la dumonda da concessiun a la Confederaziun.
RR Novitads 12:00