Damain entradas tar la taglia sin interpresas e dapli expensas pervia da la pandemia da corona: las cassas da las citads e las vischnancas vegnan ils proxims onns a vegnir sut squitsch, quai scriva l'Uniun da las citads svizras.
Las taglias sin interpresas sa reduceschan
Tenor la retschertga che la PwC ha fatg ensemen cun l'Uniun da las citads han las interpresas pajà 4% damain taglia il 2020. Il 2021 sa reduceschan las entradas tenor las prognosas schizunt per 17%. Quai en cumparegliaziun cun il 2019.
Insumma, i saja grev da far prognosas per ils proxims onns. 96% da las vischnancas e las citads dumandadas han ditg, ch'il budget per il 2022 saja ina gronda sfida. Ellas quintan che la chargia dals debits vegnia a crescher fermamain fin il 2023 – a partir dal 2022 vegnian probabel era ils custs socials a crescher.
SNB è dumandada
Tenor las citads e las vischnancas dovria en il futur grondas stentas per reducir ils debits. Tranter auter na dastgia betg pli esser, che las citads vegnian ignoradas tar la distribuziun dals daners da la Banca naziunala svizra.
Er la repartiziun da las chargias stoppia vegnir reponderada. Plinavant stoppian ins probabel desister ubain spustar investiziuns planisadas. Er il pe da taglia pudess tenor 4 da 10 vischnancas vegnir augmentà.
