Turitg-Altstetten, primavaira 2025: A l’emprima egliada sa preschenta tut sco en ina «normala» fatschenta che venda material da sport: In grond e cler local, skis, aissas e chapellinas dapertut, ed adina puspè in client u ina clienta che entra en il «Skirental Zueri» dal Surmiran Moreno Guetg (42).
«I tuna forsa curius da vender ed affittar skis en la citad da Turitg, ma jau ma sent fitg bain qua», di il mainafatschenta Moreno Guetg durant la visita da la FMR in mardi suentermezdi. Cun el lavuran tschintg emploiads ed emploiadas durant l’entir onn, «e tranteren, cura ch’i marscha fitg bler, gida era anc mia dunna Claudia», raquinta il vendider simpatic cun ragischs a Savognin. Actualmain è ses team occupà cun prender enavos ils skis dals clients.
Radund 5000 pèra skis ad onn
Il model da fatschenta è principalmain – sco ch’il num da la firma tradescha – affittar skis ed aissas ed ulteriur material ch’i basegna per sport d’enviern. Al cumenzament da la stagiun po la clientella eleger or dad ina vasta paletta da differentas marcas da skis, aissas, skis da cursa lunga ed auter. Ils blers e las bleras clientas prendian a tschains il material per l’entira stagiun, declera Moreno Guetg. E la primavaira vegn quel material puspè enavos en il grond local da «Skirental Zueri» ad Altstetten.
Ed il model funcziunia bain, sco las cifras demussan: «Quest onn èn radund 5000 pèra skis e varga 700 aissas ids sur la maisa», raquinta Moreno Guetg cun in surrir. Sia firma haja pudì crescher bain ils ultims onns. Cunzunt tar famiglias cun uffants para il sistem d’affittar ad esser fitg popular, ma era bler «expats» u turists da tut il mund tutgan tar la clientella.
«Ins na sa mai co che las vias van»
«Cura che jau hai fatg l’emprendissadi han ins forsa schon siemià ina giada d’avair in agen affar. Che quel è dentant amez Turitg, n’avess jau er betg pensà.» Sia via l’ha manà da Savognin en l’Engiadin’Ota en in fatschenta da sport, cun in pitschen stop a Turitg – e suenter tar la firma K2, nua che Moreno Guetg era responsabel per la vendita da skis en la Svizra orientala.
E precis avant 10 onns hai dà la gronda midada: l’anteriur possessur dal Ski-Rental Bertram Weder era a la tschertga dad in successur. «Nus essan svelts ans cunvegnids, e gea, dapi lura main jau il ‹Skirental Zueri›», di l’um communicativ e ri: «Ins na sa mai co che las vias van.»
«Igl è adina anc igl ir a chasa»
Ensemen cun sia dunna Claudia che lavura en il spital d’uffants e las duas figlias Elena (1) e Sarina (4) viva la giuvna famiglia en vischinanza dad Altstetten – a Berikon sin il Mutschellen. «In viadi dad Altstetten fin là cuzza circa 20 minutas cun l’auto, quai va bain.»
D’enviern è la famiglia dentant savens a Savognin, nua che ses bab viva e nua che Moreno Guetg è creschì si cun duas soras: «Nus giain prest mintga fin d’emna cun skis. Igl è adina anc igl ir a chasa, ma cun uffants han ins era adina dapli program qua. Però la gronda figlia va fitg gugent cun skis, quai fa plaschair.»
Quatter mais vi da nettegiar chalzers
Entant portan ina clienta e sia figlia enavos ils skis en il «Skirental Züri» – ed ella salida cordialmain. «En la citad vai era bler per il persunal. Blers clients enconuschan ins, quai è atgnamain sumegliant era sco en las vals en il Grischun. Nus avain ina homepage e tramettain flyers als clients, ma bler capita via contacts: Ils uffants van ensemen a scola, raquintan als conscolars. E quai marscha bain, i vegn adina dapli.» Uschia declera el il success.
«Blera glieud en il martgà n’ha era betg blera plazza en lur abitaziuns e tschalers ed en lura cuntents sch’els san puspè dar enavos l’urden.» Il tschaler da la fatschenta è damai fitg grond e vegn il proxim temp a s’emplenir da nar, cun plirs millis skis ed aissas.
Il sistem da laschar a tschains porta er anc ulteriurs avantatgs: «Uschia pudain nus er anc affittar ils products l’onn proxim, quai è era pli ecologic che da producir da nov e dat era lavur a mai ed a mes emploiads, tge che è flot.»
Cunquai che blera glieud ha schon purtà enavos il material, hai num per Moreno Guetg e ses team: Nettegiar ils chalzers da skis e far service per puspè far pront els per proxim enviern: «Cun questa lavur essan nus occupads per ils proxims quatter mais.»