Siglir tar il cuntegn

Header

La chantadura Rykka tegn ses maunsanester avant fatscha ord plaschair. Speras applaudeschan ils concurrents.
Legenda: Chantadura canadaisa represchenta Svizra a l'ESC: Rykka sa legra dal sustegn. Keystone
cuntegn

Svizra Ina canadaisa va per la Svizra al Eurovision Song Contest

La chantadura Rykka ha persvadì la sonda passada cun sia chanzun «The Last Of Our Kind» e vegn a represchentar la Svizra a l'Eurovision Song Contest 2016 a Stockholm.

En la show da decisiun per la participaziun svizra al Eurovision Song Contest (ESC) sin SRF han duas candidatas, trais candidats ed ina band chantà per far ora tgi che represchenta quest onn la Svizra a l'ESC. La decisiun ha tratga il public da televisiun ensemen cun ina giuria da 10 persunas.

Ragischs a Basilea-Champagna

Pudì persvader il pli fetg e cunquai gudagnar la show da decisiun ha la chantadura Rykka – ina canadaisa cun ragischs svizras. Rykka che ha atgnamain num Christina Rieder è creschida si a Vancouver, ses tat era emigrà da la Svizra en il Canada. Avant in per onns ha ella chattà la via enavos en Svizra per far musica e dapi l’atun passà è ella maridada – cun in Svizzer da Basilea.

Dal tut nunenconuschenta n’è Rykka betg. Ella ha gia producì divers albums ed è era gia stada d’udir ina u l’autra giada en ils radios svizzers, uschia era tar il radio rumantsch.

L'Eurovision Song Contest ha lieu il matg a Stockholm

Sche Rykka po lura era persvader avant il public internaziunal da l'ESC vegn a sa mussar ils 12 da matg. Lura ha lieu en la Globe Arena a Stockholm il segund mez final. La gronda show da final ha lura lieu ils 14 da matg.

Artitgels legids il pli savens

Scrollar a sanestra Scrollar a dretga