Siglir tar il cuntegn

Header

audio
Bunura: Elecziuns Cussegl federal – Tge spetgan ils parlamentaris grischuns
Or da Actualitad dals 11.12.2019.
laschar ir. Durada: 04:35 minutas.
cuntegn

Ina cussegliera federala verda Parlamentaris grischuns betg perina

Jon Pult e Sandra Locher-Benguerel (omadus PS) sustegnan la candidatura da Rytz. Per Martin Candinas (PCD), Madgalena Martullo (PPS) ed Anna Giacometti (PLD) èsi memia baud.

Per ils dus socialdemocrats Sandra Locher-Benguerel e Jon Pult èsi cler: I dovra uss ina represchentanta verda en il Cussegl federal. Il purtret verd che sa mussa dapi las ultimas elecziuns da l'october en il parlament stoppia er esser represchentà en la regenza. Lura han Ils Verds gudagnà 17 sezs èn il Cussegl naziunal, nua ch'els han uss tut en tut 28 sezs en la chombra gronda. En il Cussegl dals chantuns po la partida prender plaz sin tschintg enstagl da be sin in sez, sco enfin uss.

I manca il sustegn da mez

Dentant era sche la fracziun da la PS ha decidì ier suentermezdi ch'ella sustegna la candidatura verda na bastan quellas vuschs ensemen cun las vuschs verdas betg per la candidata, la presidenta da la Partida verda Regula Rytz, da far il pass en il Cussegl federal. I manca per exempel il sustegn da mez. Uschia di il cusseglier naziunal grischun da la Partida cristiandemocratica, Martin Candinas, ch'i na saja betg la soluziun per la constanza en la regenza dad agir uss massa svelt ed eleger giu in cusseglier federal u ina cussegliera federala en uffizi.

Dovra discussiun davart furmla magica

La partida verda ha oravant tut en mira il sez da la Partida liberaldemocratica, numnadamain quel dad Ignazio Cassis. Da betg pli eleger in cusseglier federal en uffizi na dastga tenor Candinas betg vegnir moda. Dentant stoppian ins discutar davart la furmla magica. Era saja l'elecziun dad Ignazio Cassis stada ina elecziun dad in represchentant da las linguas minoritaras. Quai dastgian ins era betg emblidar en la discussiun. Da quel avis è era la cussegliera naziunala da la Partida liberaldemocratica Anna Giacometti. Oravant tut saja la PLD anc adina ferma avunda per avair dus sezs en il Cussegl federal, di Giacometti.

Sco emprim confermar resultat

Ch'i na saja uss betg il dretg mument per ina cussegliera federala verda, di era la cussegliera naziunala Magdalena Martullo-Blocher da la Partida populara. Cura che la PPS aveva gudagnà marcantamain en las elecziuns haja er quella stuì confermar quatter onns pli tard la fermezza e pir lura haja la PPS survegnì in segund sez en il Cussegl federal. Uss duain era ils Verds spetgar e mussar sch'i possian confermar il gudogn en quatter onns, di Martullo.

Ils cussegliers naziunals grischuns vuschan oz tut auter che serrà. Però ch'igl è da discussiunar davart la furmla magica conferman tuts tschintg. Ma che la unda verda vegn oz en il Cussegl federal è pauc probabel.

RTR actualitad 07:00

Artitgels legids il pli savens

Scrollar a sanestra Scrollar a dretga