Siglir tar il cuntegn

Svizra Ina gasetta, in'agentura, naginas dublettas

Pliras giadas l'emna ina gasetta, dapli effizienza: Quai èn dus dals puncts che la Confederaziun pretenda da medias rumantschas. Quai di l'Uffizi federal da cultura sin dumonda da RTR. Ils puncts èn vegnids discutads il mardi en ina reuniun da divers uffizis, la Lia Rumantscha, l'ANR e RTR.

RTR e La Quotidiana.
Legenda: Ina gasetta, in'agentura, naginas dublettas. Screenshot.

La mira da l' inscunter era da vegnir a savair l'opiniun da la Confederaziun a reguard il tema medias rumantschas. Sin dumonda da RTR resumescha l'Uffizi federal da cultura las pretaisas da la Confederaziun:

  • La diversitad mediala duai esser garantida. L'agentura da novitads Rumantscha (ANR) duess survegnir ina basa largia e solida, sco er ina atgna direcziun publicistica.
  • I duai dar ina gasetta stampada, che cumpara pliras giadas l'emna.
  • Las medias duessan evitar purschidas parallelas. Vul dir: Ina pagina da novitads rumantscha en la rait basta.
  • La soluziun futura duai contribuir e promover la lingua e cultura rumantscha ordaifer il Grischun.
  • Ils daners duain vegnir investids surtut en cuntegns.

Effizienza u independenza?

Durant il discurs haja sa mussà, che tut ils participants vulan ina gasetta independenta, surregiunala e stampada, di l’Uffizi federal da cultura. El metta pais sin il fatg, che l'ANR restia independenta. Perquai duessan els era survegnir in agen schefredactur.

L'Uffizi pretenda dentant er, ch’ils daners vegnian imponids surtut per cuntegns. Tut duess vegnir uschè effizient sco pussaivel. Quai discurra per ina agentura sut tetg da RTR. Pussibel fiss dentant era, dad unir mo l'administraziun e la coordinaziun sut in tetg. Las redacziuns restassan vinavant independentas.

Proxims pass

La Lia Rumantscha vegnia uss ad analisar diversas variantas per las medias rumantschas, di l'Uffizi federal da cultura. Ulteriuras sesidas vegnan ad esser durant l'atun. Il termin per in plan concret è ils 31 d'october. Fin là sto la gruppa da lavur preparar in model, che correspunda a tut las premissas ed als basegns dals Grischuns e Grischunas. Sche tut ils uffizis èn d'accord, vulan els metter enturn il model preschentà fin il 2019.

RR Actualitad 12:00