I na saja strusch pussaivel ch'ils organs da segirtad sajan al dretg lieu, sch'insatgi che na saja mai dà en igl a las autoritads, commettia tut surprendentamain in act criminal. En da quels cas na gidia quai er betg bler, sch’in accumpagnader da trens saja là.
SOB examinescha dispositiv da segirezza
La Südostbahn (SOB) vul en mintga cas anc ina giada examinar intensivamain ses dispositiv da segirezza. La segirezza dals passagiers haja la pli auta prioritad, communitgescha la viafier. Ins saja consternà ch'ils passagiers dal tren pertutgà hajan stuì far tras ina tala paina. Il president dal cussegl d'administraziun ha exprimì sia cumpassiun cun ils confamigliars da las unfrendas.
Giuvna da 17 onns è anc adina en in stadi critic
Tar l'attatga da la sonda passada èn morts ina dunna da 34 onns e l'attatgader da 27 onns. Tschintg ulteriuras persunas èn vegnidas blessadas, e quai per part grevamain. La mattatscha da sis onns, sco era ina dunna da 43 onns n'èn betg pli en privel da vita, ha ditg la polizia songagliaisa sin dumonda da l’agentura da novitads svizra, sda. La giuvna da 17 onns, la terza persuna che l'attatgader ha blessà grevamain, saja tenor ils medis dentant vinavant en in stadi critic.
Daco n’è vinavant betg cler
Davart l’attatgader e la raschun daco ch’el ha attatgà cun in cuntè e fieu ils passagiers d’in tren regiunal la sonda passada è pauc ni nagut enconuschent. «I na dettia naginas scuvertas», ha ditg il pledader da la polizia a la sda. L’um aveva tenor la polizia ses domicil en in chantun vischinant dal S. Gagl, viveva dentant era en il Principadi dal Liechtenstein, nua ch’ella ha intercurì ina chasa.
RR novitads 12:00++