Jau hai adina interpretà l’uffizi da cussegliera federala sco servetsch a nossa societad, a noss pajais ed hai empruvà da betg administrar, mabain da furmar. E quai hai jau fatg cun grond plaschair ed engaschament.
Sco commembra dal Cussegl federal hajan ins ina gronda responsabladad per il pajais, di Leuthard. Ma ins haja er grond spazi da furmar, d'accumpagnar la Svizra, ensemen cun il parlament ed il pievel, en il futur.
Jau hai fatg fitg gugent quella lavur. Ella è stada pretensiusa, dentant er enritginta e fitg varianta.
Anc restan trais mais en uffizi. Enfin lura na vegnia ella betg a metter ils mauns en crusch, uschia la cussegliera federala.
Tge vegn suenter?
Sin la dumonda davart ses futur di Leuthard ch'ella laschia vegnir sco ch'i vegn. Ella saja leda da betg pli avair in'agenda talmain emplenida ed ella vegnia era a s'engaschar socialmain. Vinavant sa legria Leuthard da betg pli stuair pachetar duas giadas l'emna la valischa, mabain d'avair dapli temp per ses um e la famiglia.
Speculaziuns davart sia demissiun
Adina puspè èsi stà d'udir currellas che Doris Leuthard vegnia a demissiunar. Ma avant la demissiun da la scheffa dal Departament federal per ambient, traffic, energia e communicaziun è dentant vegnida quella da ses collega Johann Schneider-Ammann, ils 25 da settember. Uss chala er ella.
Uss duain dentant novas, frestgas forzas prender plaz en la regenza.
Bilantscha da votaziuns
Leuthard è para la meglra commembra dal Cussegl federal, quai sch'i va per votaziuns dal pievel. Sia bilantscha: Da total 18 votaziuns dal pievel ha ella pers sulettamain duas.
Critica e laud
Las uniuns per l'ambient han guardà enavos sin la lavur da Doris Leuthard. Uschia haja ella dà stausch a la midada sin il sectur da l'energia, ma en la politica dal clima e da la biodiversitad haja era anc inA successurA da far bler.
Auters èn da l'avis che Leuthard avess stuì s'engaschar pli fitg per il spustament dal transport da rauba sin ils binaris e per la protecziun da las alps.
Dapi il 2006 en il Cussegl federal
Doris Leuthard è vegnida elegida sco successura da Joseph Deiss e fa dapi il prim d'avust 2006 part dal Cussegl federal. Ils emprims quatter onns è ella stada parsura dal Departament federal d'economia. Il 2010 lura ha ella surprendì il Departament federal per ambient, traffic, energia e communicaziun ch'ella maina anc oz. Durant quest temp è Leuthard stada duas giadas presidenta da la Confederaziun – quai il 2010 ed il 2017. Avant è la dunna da 55 onns stada cussegliera naziunala dal chantun Argovia e presidenta da la Partida cristiandemocratica svizra.
RR novitads 11:00